11.04.2016

Սիրով տեղեկացնում ենք, որ 2016թ. ապրիլի 29-30-ին Գիտությունների ազգային ակադեմիայի նախագահության շենքում տեղի է ունենալու «Գիտության և տեխնիկայի մերձեցում» (Science and Technology Convergence) խորագրով գիտաժողով։

Գիտաժողովի նպատակն է խրախուսել ՏՏ ոլորտի գիտության և արդյունաբերության փոխշահավետ համագործակցությունը՝  ստեղծելով մասնագիտական բազմապրոֆիլ հարթակ, որը հնարավորություն կտա ՏՏ ոլորտի գիտաշխատողներին ներկայացնել իրենց կողմից իրականացվող և կիրառական հետաքրքրություն ներկայացնող հետազոտությունների արդյունքները, մասնավոր և պետական սեկտորների մասնակիցներին՝  ներկայացնել իրենց գործունեությանը առնչվող գիտական  բաց խնդիրները, բարձր կուրսերի ուսանողներին՝ ծանոթանալ  ՀՀ-ում  իրականացվող գիտահետազոտական աշխատանքներին:

Գիտաժողովի շրջանակներում ՏՏ ոլորտի շահագրգիռ կողմերին՝ գիտության, արդյունաբերության և պետական կառույցների ներկայացուցիչներին, հրավիրում ենք ներկայացնելու իրենց կողմից ձեռք բերված արդյունքները, առկա բաց խնդիրները, ինչպես նաև հնարավոր համագործակցության ուղիները հետևյալ ուղղություններով՝

• Համակարգչային տեսունակություն (Computer Vision)
• Մեքենայական ուսուցում (Machine Learning)
• Ինֆորմացիայի անվտանգություն (Information Security)
• Միկրոէլեկտրոնիկա (Microelectronics)

Գիտաժողովի ընթացքում նախատեսվում է անցկացնել նաև պանել-քննարկումներ հետևյալ թեմաներով՝

• Անջրպետների կամրջում. գիտություն, արդյունաբերություն և պետական կառույցներ (Bridging gaps: science, industry and state)
• Կրթություն. պահանջ և առաջարկ   (Education: demand and supply)
• Գաղափարների ձևավորման էկոհամակարգ. Համալսարաններ, ստարտափներ, աքսելերատորներ, ինկուբատորներ (Idea forming ecosystem: universities, start-ups, accelerators, incubators)

Գիտաժողովը կազմակերպում է ՀՀ ԳԱԱ Ինֆորմատիկայի և ավտոմատացման պրոբլեմների ինստիտուտը, ՀՀ ԳԱԱ, ՀՀ ԿԳՆ ԳՊԿ, ԵԳԱԾ, ՀԵՀ և ՁԻՀ (EIF) աջակցությամբ։ Մանրամասներին ծանոթանալու և գրանցվելու համար կարող եք այցելել www.stcc.am կայք, իսկ հարցերի դեպքում՝ գրել stc@asnet.am հասցեով։